Netflix striming platformasy Warner Bros. Discovery-ny satyn almak baradaky şertnamanyň şertlerini üýtgetdi. Indi platforma kompaniýanyň aktiwlerini nagt görnüşinde satyn almak, şol bir wagtyň özünde-de şertnamanyň umumy bahasyny 82,7 mlrd dollar derejesinde saklamak isleýär.
Netflix-iň we Warner Bros. Discovery-nyň müdirler geňeşleri gözden geçirilen şertleri biragyzdan goldady. Şertnamany ýapmagyň möhleti Discovery Global-yň bölünmeginiň tamamlanmagyna, düzgünleşdiriji edaralardan ygtyýarnamalaryň alynmagyna, Warner Bros. Discovery-nyň paýdarlarynyň tassyklamagyna we beýleki şertleriň berjaý edilmegine baglydyr.
Birleşmek barada üýtgedilen şertnama laýyklykda, Netflix hyzmatdaş tarapyň paýdarlaryna her paý üçin 27,75 dollar nagt bermekçi bolýar. Şertnama Warner Bros. Discovery-yň kino we telestudiýalaryny, kontent ýygyndysyny we HBO Max striming hyzmatyny öz içine alýar. Ilkibaşda Netflix Warner Bros.-yň paýdarlaryna 23,25 mlrd dollar nagt we kompaniýanyň adaty paýnamalary görnüşinde 4,5 mlrd dollar teklip edipdi. Şol bir wagtyň özünde, şertnama Netflix-iň gymmatly kagyzlary bir paý üçin 97,91 dollardan aşak düşen ýagdaýynda düzedişleriň bolmagyny göz öňünde tutdy.
Platforma doly nagt puluň Warner Bros. kompaniýasynyň paýdarlaryna alnan tölegleriň möçberine «uly ynam» berýändigini we «bazar kesgitsizligini» azaldýandygyny belledi. Kompaniýa täze şertler aktiwleri satyn alyş prosesini hem çaltlaşdyrar diýip hasaplaýar. Warner Bros.-yň paýdarlarynyň şertnama boýunça 2026-njy ýylyň apreline çenli ses bermegine garaşylýar.
Ýatlap geçsek, «Uornerleriň» müdirler geňeşi Netflix bilen şertnamany goldady, ýöne Paramount Skydance bu ylalaşygy bozmaga çalyşýar. Ol Netflix-den tapawutlylykda tutuş kompaniýany satyn almak teklibi bilen gönüden-göni Warner Bros.-yň paýdarlaryna ýüzlendi.
Reuters-iň habar bermegine görä, 2025-nji ýylyň 5-nji dekabrynda birleşmek barada yglan edileni bäri Netflix-iň paýnamalary tas 15% pese gaçdy. 20-nji ýanwarda geçirilen deslapky söwdanyň dowamynda kompaniýanyň gymmatly kagyzlary şertnamanyň şertleriniň üýtgedilendigi baradaky habaryň netijesinde 1,3% ýokarlandy. Paramount-yň paýnamalary 0,9%, Warner Bros.-yňky 0,2% pese gaçdy.
