Warner Bros. Discovery kompaniýasy Paramount Skydance bilen bahasy 110 milliard dollara deň bolan birleşmek baradaky şertnamany baglaşdy. Bu barada Paramount kompaniýasynyň resmi saýtynda habar berilýär. Indi bu şertnama Ýewropa komissiýasynyň tassyklamagyna garaşýar.
Birleşen kompaniýa ýylda azyndan 30 filmi prokata çykarmagy meýilleşdirýär: olaryň 15-isi Warner Bros., galan 15-isi bolsa Paramount Pictures tarapyndan taýýarlanar. Mundan ozal Warner Bros. kompaniýasynyň Netflix bilen ylalaşyk baglaşandygy sebäpli, Paramount indi striming platformasyna şertnamanyň ýatyrylandygy üçin 2,88 milliard dollar tölär.
Bu söwdanyň öňüsyrasynda Netflix kompaniýasy Warner Bros.-y satyn almakdan ýüz öwrüpdi. Ondan biraz wagt öň Paramount has bähbitli şertleri hödürledi, Netflix bolsa bahany ýokarlandyrmazlyk kararyna gelip, beýle ýagdaýda satyn alşyň «maliýe taýdan özüne çekiji» bolmajakdygyny aýtdy.
Netijede, Paramount tutuş Warner Bros. Discovery kompaniýasyny 110 milliard dollara dolulygyna satyn aldy. Netflix bolsa diňe Warner Bros. kinostudiýasyny, HBO Max striming platformasyny we HBO teleýaýlymyny 82,7 milliard dollara satyn almagy meýilleşdiripdi.
Geçen ýylyň dekabrynda Warner Bros. ilki Netflix-iň teklibine razylyk beripdi we Paramount tarapyndan teklip peýda bolanda, ilki ony ret etdi. Ýöne Paramount niýetinden el çekmedi we şertlerini birnäçe gezek gowulandyryp, ahyrynda Warner Bros.-yň öz teklibini saýlamagyny gazandy.
