Paramount kompaniýasy Warner Bros.-y almak üçin Netflix bilen göreşde teklibini ýokarlandyrdy

Paramount Skydance kompaniýasy Warner Bros. Discovery-ny satyn almak baradaky teklibini resmi taýdan her paýnama üçin 31 dollara çenli ýokarlandyrdy diýip, CNN neşiri Warner Bros. Discovery-nyň beýanatyna salgylanyp habar berýär. Warner Bros. Discovery bu teleýaýlymyň baş kompaniýasy bolup çykyş edýär.
Häzire çenli Paramount her paýnama üçin 30 dollar hödürleýärdi, emma Warner Bros. Discovery bu teklibi Netflix bilen boljak şertnama bilen deňeşdirilende «az bähbitli» diýip ret edipdi.
Indi bolsa Warner Bros. Discovery-nyň müdirler geňeşi bolup biljek şertnama boýunça Paramount bilen gepleşikleriň möhletiniň uzaldylandygyny mälim etdi. Muňa garamazdan, kompaniýa Netflix bilen birleşmek baradaky ylalaşygyň «güýjünde galýandygyny» aýratyn nygtady. CNN tarapyndan pikirleri soralan analitikler Netflix-iň hem, ähtimal, şeýle bahany hödürlejekdigi baradaky çaklamalaryny aýtdy.
Mundan başga-da, her paýnama üçin ýokary baha hödürlemek bilen bir hatarda, Paramount, eger şertnama ABŞ-nyň kadalaşdyryjy edaralarynyň karary sebäpli başa barmasa, Warner Bros. Discovery-ä «7 mlrd dollar möçberinde öwez tölegini» tölemegi wada berdi.