Paramount Skydance kompaniýasy Warner Bros. Discovery-nyň Netflix striming hyzmaty bilen birleşmeginiň öňüni almak üçin konglomeratyň müdirler geňeşine öz dalaşgärlerini hödürlemek meýilnamalary barada yglan etdi. Bu barada The New York Times-yň makalasynda aýdylýar.
Mundan başga-da, Dewid Ellisonyň ýolbaşçylygyndaky kompaniýa Warner Bros.-yň üstünden kazyýete arza berip, kinostudiýanyň ýolbaşçylygynyň näme üçin Netflix-iň studiýany 82,7 mlrd dollara satyn almak teklibini has bähbitli hasap edendigi barada jikme-jik maglumat bermegi talap etdi.
Paramount Skydance studiýany eýýäm dört aý bäri satyn almaga synanyşýar. Ol Warner Bros Discovery-nyň tutuş biznesi üçin Netflix-den has köp mukdary teklip etdi: bir paý üçin 30 dollar (jemi 108,4 mlrd dollar), striming platformasy bolsa bir paý üçin 27,75 dollar (kompaniýanyň kabel kanallaryny goşmazdan, diňe kino we striming hyzmaty üçin jemi 82,7 mlrd dollar).
Ellison paýdarlara ýyllyk ýa-da ýörite ýygnakda bu şertnama garşy çykmakçydygyny aýtdy.
Warner Bros. şikaýat arzasyny esassyz diýip atlandyrýar we Paramount «bahany ýokarlandyrmady we öz teklibindäki aýdyň kemçilikleri düzetmedi» diýip hasaplaýar.
Netflix bilen mümkin bolan birleşme ABŞ-da çekişmelere getirdi. Ýurduň Prezidenti Donald Tramp monopoliýa garşy edaralary şertnamany düýpli gözden geçirmäge çagyrdy.
