Warner Bros. Discovery-nyň müdirler geňeşi Paramount Skydance kompaniýasynyň 108,4 mlrd dollara holdingi satyn almak teklibini ret etdi diýip, Reuters agentligi habar berýär.
Kompaniýanyň ýolbaşçylygy paýdarlary gymmatly kagyzlary her paý üçin 30 dollar bahadan satmazlyga we Netflix bilen şertnama taýýarlanmagy dowam etdirmäge çagyrdy.
Holdingiň aktiwleri üçin iki media kompaniýasynyň göreşi eýýäm birnäçe aý bäri dowam edýär. Netflix 82,7 mlrd dollara (paý üçin 27,75 dollar) Warner Bros. kinostudiýasyny we HBO Max striming hyzmatyny satyn almak isleýär. Muňa jogap hökmünde Paramount 108 mlrd dollara tutuş korporasiýany, şol sanda CNN, TNT Sports we Discovery telekanallaryny satyn almagy teklip etdi. Bu meýilnamany durmuşa geçirmek üçin kompaniýa Ýakyn Gündogaryň garaşsyz gaznalaryndan we Donald Trampyň giýewi Jared Kuşnere degişli bolan Affinity Partners firmasyndan maýa çekdi.
Paramount-yň teklibiniň maliýe taýdan özüne çekijiligine garamazdan, Warner Bros. Discovery-nyň müdirler geňeşi ylalaşykda uly töwekgelçilikleri görýär we kompaniýany paýdarlary ýalňyşdyrmakda aýyplaýar.
Ýagdaý syýasy tarapdan kynlaşýar: ABŞ-nyň Prezidenti Donald Tramp Netflix-iň bazar paýynyň artmagynyň «mesele bolup biljekdigini» aýdypdy. Şol bir wagtyň özünde, Paramount-yň ýolbaşçysy Dewid Ellisonyň kakasy – milliarder we Oracle kompaniýasynyň müdirler geňeşiniň başlygy Larri Ellison Ak tam bilen ýakyn aragatnaşyk saklaýar.
Paýdarlaryň bellibir netije çykarmagy üçin wagt bar, çünki Paramount-yň teklibi 2026-njy ýylyň 8-nji ýanwaryna çenli güýjünde galýar.
