Halkara zenanlar güni mynasybetli Türkmenistanyň aýal-gyzlaryna döwlet Baştutanynyň adyndan 60 manat möçberinde pul sowgatlary gowşurylar. Degişli Buýruga Türkmenistanyň Prezidenti anna güni geçirilen Ministrler Kabinetiniň mejlisinde gol çekdi diýip, TDH habar berýär.
Resminama laýyklykda, sowgatlar 2026-njy ýylyň 2 — 6-njy marty aralygynda dabaraly ýagdaýda gowşurylmaly.
Prezidentiň sowgatlary kimlere gowşurylar:
- Eýeçiliginiň görnüşine garamazdan, ähli kärhanalarda, edaralarda we guramalarda işleýän aýal-gyzlara;
- Pensiýa we döwlet kömek puluny alýan aýal-gyzlara;
- Önümçilikden aýrylmak şerti bilen aspiranturada, doktoranturada we kliniki ordinaturada okaýan aýal-gyzlara;
- Türkmenistanyň Prezidentiniň ýanyndaky Döwlet gullugy akademiýasynyň iki okuw ýylyndan az bolmadyk möhletli okuwlarynyň diňleýji zenan-gyzlaryna;
- Talyp gelin-gyzlara, mekdep okuwçylaryna we mekdebe çenli çagalar edaralarynda terbiýelenýän gyzlara.
Bu karar «Berkarar döwletiň täze eýýamynyň Galkynyşy döwründe ýurdumyzyň gülläp ösmeginde we özgertmeleri amala aşyrmakda zenanlarymyzyň bitirýän uly hyzmatlaryny, olaryň Watanymyza wepaly, sagdyn, ruhubelent nesilleri terbiýeläp ýetişdirýändiklerini nazara alyp, şeýle hem ata-babalarymyzyň mähriban enelerimize, eziz uýalarymyza hormat goýmak baradaky asylly däplerini dowam etdirmek» maksady bilen kabul edildi.
