Norwegiýanyň ýygyndy topary bir gyşky Olimpiadada gazanylan altyn medallaryň sany boýunça öz rekordyny täzeledi. Milan we Kortina şäherlerinde geçirilýän Gyşky oýunlarda bu ýurduň türgenleri iň ýokary derejeli baýraklaryň 17-sini eýelediler.
Öňki rekord (16 altyn medal) mundan dört ýyl ozal Pekinde geçirilen Olimpiadada norwegiýaly türgenleriň hut özleri tarapyndan goýlupdy.
Ýygyndy toparyň gapjygyna 17-nji altyny biatlonçy Ýohannes Dale-Şewdal getirdi. Ol 15 kilometrlik mass-startda öz watandaşy Sturl Holm Legreýdi we Fransiýanyň wekili Kanten Fiýon-Maýýeni yzda galdyryp, birinji bolmagy başardy.
Biatlon bilen bir hatarda, Norwegiýanyň türgenleri lyža ýaryşlary, fristaýl, lyža goşa-göreşi, tramplinden bökmek we konki ýaryşynda hem öňdeligi eýelediler.
Lyžaçy Ýohannes Klebo häzirki oýunlarda bäş altyn medal gazandy. Onuň hasabynda jemi 10 sany iň ýokary derejeli baýrak bar. Munuň özi Gyşky oýunlaryň elýetmez rekordydyr.
Italiýadaky ýaryşlar şu gün, 22-nji fewralda tamamlanar. Oýunlaryň ýapylmagyna çenli erkekleriň arasynda 50 kilometrlik lyža ýaryşynda ýene bir medal toplumy ugrunda bäsleşik geçiriler.
