2030-njy ýylyň Oýunlarynyň guramaçylyk komiteti Fransiýanyň Alp daglarynda geçiriljek Olimpiýa we Paralimpiýa oýunlarynyň logotiplerini hödürledi.
Olimpiadanyň nyşanynda dürli galyňlykdaky we bir ujy çala gyzyl öwüşginli sekiz sany gök çyzyk şekillendirilipdir. Olar bir wagtda hem dagy, hem-de Gün şöhlelerini emele getirýär.
Paralimpiýa oýunlarynyň nyşanynda bolsa 16 sany çyzyk çepe we saga tarap ýaýrap, dagyň relýefini döredýär. Netijede, bu iki simwol biri-biri bilen utgaşyp, inedördüli emele getirýär.
Guramaçylyk komitetiniň ýolbaşçysy Edgar Grospironyň düşündirişine görä, bu iki nyşan bilelikde Fransiýanyň Alp daglaryny we olaryň ýagtysyny alamatlandyryp, bir bitewüligi emele getirýär. Olar bilelikde Olimpiýa we Paralimpiýa hereketlerine deň derejede orun, güýç we görnüş bermäge ygrarlylygy görkezýär.
Komitet nyşanlarda daglyk sebitleriň iki sany elementinden — ýagtylykdan we buzdan ylham alnan reňk öwüşginleriniň ulanylandygyny düşündirdi. Gijeki gök we dury gök reňkler beýikligi, çuňlugy, durnuklylygy hem-de gözýetimi ýada salýar. Gyzyl we gülgüne Alp şöhlelenmeleri bolsa Gün şöhleleriniň dag depelerini gyzdyryp, tebigaty janlandyrýan pursatlaryny görkezýär.
2024-nji ýylyň iýulynda Halkara olimpiýa komiteti 2030-njy ýylyň gyşky Olimpiýa oýunlaryny geçirmek hukugyny Fransiýa beripdi. Bu ýurduň arzasy ýeke-täkdi. 2034-nji ýylyň gyşky Olimpiadasy barada aýtsak, häzirlikçe bu hukugy Amerikanyň Solt-Leýk-Siti şäheri aldy. Onuň hem arzasy ýeke-täk arza boldy. Netijede, bu şäher ikinji gezek Olimpiýa oýunlarynyň paýtagty bolup biler: bu ýerde oýunlar mundan ozal 2002-nji ýylda geçirilipdi.
