Fransiýanyň futbolçylar bileleşigi (UNFP) «Pari Sen-Žermen» toparynyň hüjümçisi Usman Dembeleni Fransiýanyň Liga 1-inde 2025/2026 möwsümiň iň gowy oýunçysy diýip ykrar etdi. Futbolçy bu baýragy bassyr ikinji gezek aldy.
Iň gowy oýunçy diýen ada onuň klubdaşlary Nunu Mendeş we Witinýa («PSŽ»), şeýle hem Meýson Grinwud («Marsel») we Florian Towen («Lans») hem dalaş etdi.
Liga 1-iň häzirki möwsüminde Dembele 20 oýna gatnaşyp, 10 gol geçirdi we alty assist etdi. Hüjümçi dokuz gezek esasy düzümde meýdança çykdy. Geçen möwsümde bolsa 29 oýunda 19 gol we sekiz assist bilen tapawutlanypdy.
Dembeleniň «PSŽ» bilen şertnamasy 2028-nji ýylyň 30-njy iýunyna çenli hereket edýär. Transfermarkt-yň maglumatyna görä, oýunçynyň bazar gymmaty 100 million ýewro diýlip bahalandyrylýar.
Şeýle-de, UNFP möwsümiň simwolik ýygyndysyny hödürledi. Oňa Dembele, Aşraf Hakimi, Willian Paço, Nunu Mendeş, Witinýa (hemmesi — «PSŽ»), Risser, Sarr, Sangare, Florian Towen (hemmesi — «Lans»), şeýle hem Korenten Tolisso («Lion») girdi.
Möwsümiň iň gowy tälimçisi diýlip «Lans» toparyndan Pýer Saž saýlandy. Daşary ýurtda çykyş edýän iň gowy fransuz futbolçysy baýragyna «Bawariýanyň» wingeri Maýkl Olise mynasyp boldy. Afrikada parahatçylyk söýüji we ynsanperwer başlangyçlary goldandygy üçin Didýe Drogba «Fondaction du Football Citizen Player Trophy» baýragyny aldy.
