Google kompaniýasy Gemini goşundysyna emeli aňa esaslanýan saz döretmek funksiýasyny goşdy. Ulanyjy diňe döretmek isleýän aýdymyny söz bilen beýan etmeli, şondan soň hyzmat ýazgysy, sözleri we suraty (obložkasy) bolan 30 sekuntlyk sazy taýýarlap berýär.
Saz döretmek işine DeepMind bölümi tarapyndan işlenip düzülen täze Lyria 3 modeli jogap berýär. Aýdymlar üçin suratlary bolsa Nano Banana modeli döredýär.
Tekstli soraglardan başga-da, ulanyjylar surat ýa-da wideo ýükläp bilerler, şonda ulgam şol şekiliň häsiýetine görä saz saýlap berer. Sazyň stilini, depginini we sesini sazlap bolýar. Şeýle-de, gowy görýän aýdymçyňyzyň sesine meňzeş saz döretmegi haýyş edip bilersiňiz, ýöne göni nusga almak gadagandyr — munuň üçin ýörite gorag süzgüçleri ulanylýar.
Düzüjiler Lyria 3-iň ozalky wersiýalara garanyňda has çylşyrymly we hakyky sazlary döredýändigini belleýärler. Bu funksiýa eýýäm bütin dünýäde 18 ýaşdan uly ulanyjylar üçin elýeterli we 9 dili, şol sanda iňlis, nemes, fransuz, ispan, ýapon we portugal dillerini goldaýar.
Mundan başga-da, Google awtorlara wideo üçin emeli aň sazyny döretmäge mümkinçilik berýän YouTube-daky Dream Track guralyna elýeterliligi giňeltdi. Ozal ol diňe ABŞ-da işleýän bolsa, indi ähli ýerde elýeterli.
Döredilen ähli sazlarda SynthID sanly suw belgisi goýulýar. Onuň kömegi bilen sazyň emeli aň tarapyndan döredilendigini barlap bolýar.
