2026-njy ýylyň 17-nji fewralynda Ankara şäherindäki Ýaşar Kemal adyndaky Medeniýet merkezinde geçirilen Türkmen kinosynyň günleriniň çäginde «Kompozitor» atly çeper filmiň görkezilişi we baýrak gowşurylyş dabarasy boldy. Bu barada Türkmenistanyň Daşary işler ministrliginiň metbugat gullugy habar berýär.
Dabaranyň dowamynda kinonyň saz bezegi ugrunda gazanylan ýokary üstünlikler üçin kompozitor Kerim Berdimuhamedow TÜRKSOY-yň «Ganatly altyn bedew» atly ýörite baýragy bilen sylaglandy. Şeýle-de, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň filme goşan uly goşandy nazara alnyp, gazna «Uly ganatly laçyn» baýragy gowşuryldy.
Baýraklary TÜRKSOY guramasynyň Baş sekretary Sultan Raýew gowşurdy, olary türkmen tarapyndan Medeniýet ministri A.Şamuradow kabul etdi.
Ministr öz çykyşynda türkmen kino işgärleriniň zähmetine berlen ýokary baha üçin hoşallygyny beýan edip, Prezident Serdar Berdimuhamedowyň we Halk Maslahatynyň Başlygy Gurbanguly Berdimuhamedowyň tagallalary netijesinde türkmen kinematografiýasynyň ösmegine uly goldawyň berilýändigini nygtady.
Bu baýraklar häzirkizaman türkmen kinosynyň milli gymmatlyklary dünýä ýaýmakda we halkara medeni giňişliginde mynasyp orun eýelemekde gazanan uly üstünliginiň nobatdaky subutnamasy boldy.
«Kompozitor» çeper filmi Türkiýede TÜRKSOY-yň ýörite baýraklaryna mynasyp boldy
- şu gün 16:46
- 537
