Rumyniýada derman serişdelerine durnukly 5 müňýyllyk bakteriýa tapyldy

Rumyn alymlary Skerişoara gowagyndan häzirkizaman antibiotiklerine durnukly bolan gadymy bakteriýa ştammyny tapdy. Bu tapyndy barada «Frontiers in Microbiology» ylmy žurnalynda habar berilýär.
Psychrobacter SC65A.3 bakteriýasy ýaşy, takmynan, 5 müň ýyl diýlip çak edilýän buz gatlaklarynda ýüze çykaryldy. Barlaglar bu ştammyň häzirki antibiotikleriň birbada 10 görnüşine garşy durmaga ukyplydygyny görkezdi. Şeýle hem bakteriýada derman maddalarynyň täsirini bitaraplaşdyrmaga gönükdirilen 100-e golaý gen tapyldy.
Rumyniýanyň Ylymlar akademiýasynyň Biologiýa institutynyň uly ylmy işgäri Kristina Purkerýa buzlaryň eremegi bilen şeýle mikroorganizmleriň daşky gurşawa ýaýrap, öz durnuklylyk ukyplaryny beýleki bakteriýalara geçirip biljekdigini belledi. Onuň aýtmagyna görä, bu ýagdaý mikroblaryň dermanlara bolan durnuklylygynyň ýokarlanmak meselesini has-da kynlaşdyryp biler.
Şeýle-de bolsa, hünärmen gadymy bakteriýalary öwrenmegiň durnuklylyk mehanizmleriniň entek adamzat tarapyndan antibiotikler köpçülikleýin ulanylyp başlanmazdan ozal nähili emele gelendigine düşünmäge kömek edýändigini aýtdy.
Mundan başga-da, Psychrobacter SC65A.3 bakteriýasy stafilokokk, gök iriňli taýajyk we beýleki superbakteriýalar diýlip atlandyrylýan mikroblaryň köpelmegini saklaýan maddalary bölüp çykarýar. Bu bolsa bu ştammy geljekki ylmy barlaglar üçin ähmiýetli obýekte öwürýär.