Nepally şerpa-alpinist 15 günüň dowamynda Ewerest depesine dört gezek çykyp, Ginnesiň rekordlar kitabynyň şahadatnamasyny aldy. 30 ýaşly Taşi Gýalsen 2025-nji ýylyň 9-njy, 14-nji, 19-njy we 23-nji maýynda Jomolungma depesine günorta tarapyndan çykyp, alpinizm taryhyna girdi diýip, «The Himalayan Times» gazeti habar berýär.
Ol depä ilkinji gezek 9-njy maýda dünýäniň iň belent nokadyna barýan ýoly taýýarlaýan we ýüp çekýän toparyň düzüminde çykdy. 14-nji maýda depä ýeke özi çykdy, 19-njy maýda bolsa ýolbelet hökmünde ýokaryk galdy. Onuň dördünji çykyşy hem ýene-de ýekeleýin boldy.
Gýalsen bu rekordy diňe özi üçin däl, eýsem halkara derejesinde ünsi çekýän nepally alpinistlere bolan garaýşyň üýtgemeginde tutuş şerpa jemgyýeti üçin «möhüm pursat» diýip atlandyrdy.
Ewerest dünýäniň iň belent dagy bolup, onuň iň ýokary nokady 8848,86 metre ýetýär. Ol Nepal bilen Hytaýyň serhedinde ýerleşýär. Şu wagta çenli bu depä 12 müňden gowrak gezek çykyldy. Gynansak-da, her ýyl belentlige çykmak synanyşygy wagtynda ýüzlerçe adam wepat bolýar.
Şol sebäpli geçen ýyl Nepalyň häkimiýetleri syýahatçylaryň howpsuzlyk derejesini ýokarlandyrmak üçin täze düzgün girizdi: indi Ewereste diňe ýurduň, iň bolmanda, 7 müň metr belentlikdäki islendik bir depesine çykan alpinistlere çykmaga rugsat berilýär.
