Bloomberg: техногиганты предрекают кризис индустрии потребительской электроники

Dünýäniň iri tehnologiýa kompaniýalarynyň ýolbaşçylary sarp ediş elektronikasy pudagynda uly kynçylyklaryň gelip ýetýändigi barada duýdurýarlar. Emeli aň üçin niýetlenen maglumatlary işlemek merkezleriniň (data-center) örän ýokary islegi, smartfonlarda, noutbuklarda we beýleki ýokary tehnologiýaly enjamlarda ulanylýan DRAM (dinamiki operatiw ýat) mikroshemalarynyň gytçylygyna alyp barýar.
Bloomberg agentliginiň maglumatlaryna görä, DRAM ýadynyň bir görnüşiniň bahasy diňe dekabr-ýanwar aýlarynyň dowamynda 75% ýokarlandy. Nvidia kompaniýasynyň emeli aň üçin öndüren täze çipleriniň talap edýän ýat göwrümi birnäçe güýçli şahsy kompýuterleriňkiden hem köpdür. Bu bolsa bazardaky durnuksyzlygy has-da güýçlendirýär.
Elektronika öndürijileri eýýäm öz meýilnamalaryna düzediş girizip başladylar. Mysal üçin, Sony kompaniýasy PlayStation oýun konsolynyň täze nesliniň çykarylyşyny 2028-nji ýa-da 2029-njy ýyla süýşürmek meselesine garaýar. Hytaýyň smartfon öndürijileri 2026-njy ýyl üçin önümçilik meýilnamalaryny 20%-e çenli gysgaltmagy göz öňünde tutýarlar.
Bloomberg-iň seljerijileri DRAM gytçylygynyň ýylyň dowamynda saklanjakdygyny çaklaýarlar. Arzan smartfonlaryň şaýlarynyň jemi bahasynda bu ýadyň tutýan orny eýýäm 30%-e ýetip biler, bu bolsa 2025-nji ýylyň başyndaky görkezijiden üç esse ýokarydyr.