Köneürgenç etraby Türkmenistanda iň gowy etrap diýlip ykrar edildi we $1 mln möçberinde baýrak aldy

Daşoguz welaýatynyň Köneürgenç etraby 2025-nji ýylyň jemleri boýunça Türkmenistanyň etraplarynyň arasynda geçirilýän her ýylky döwlet bäsleşiginiň ýeňijisi boldy. Bu barada Ministrler Kabinetiniň giňişleýin mejlisinde Kärdeşler arkalaşyklarynyň Milli merkeziniň başlygy Oguljennet Berdiliýewa habar berdi.
Prezident Serdar Berdimuhamedow mejlisiň dowamynda etrabyň häkimligini 1 million ABŞ dollary möçberindäki pul baýragy bilen sylaglamak hakynda resminama gol çekdi diýip, TDH habar berýär.
Bellenilişi ýaly, Köneürgenç etraby 2025-nji ýylyň jemleri boýunça welaýatlaryň etraplarynyň, etrap hukukly şäherleriň we Aşgabat şäheriniň etraplarynyň arasynda durmuş, ykdysady we medeni görkezijiler boýunça iň ýokary netijeleri görkezdi.
Türkmenistanyň Merkezi bankyna görkezilen pul baýragyny Türkmenistanyň Altyn asyryny ösdürmegiň döwlet gaznasynyň serişdelerinden bölüp bermek tabşyryldy.
Şeýle hem ýurduň Prezidenti 2026-njy ýylyň jemleri boýunça hem bäsleşik yglan etmek hakynda resminama gol çekdi. Resminama laýyklykda, ýeňiji bolan etraby kesgitlemek boýunça topar döredildi we onuň düzümi tassyklanyldy.
Bu bäsleşik ýurduň etraplarynda we şäherlerinde durmuş, ykdysady hem-de medeni ulgamlarda ýokary netijeleriň gazanylmagyny, şeýle hem döwrebap önümçilikleriň döredilmegini höweslendirmek maksady bilen geçirilýär.