Tuluzadaky Kosmos medisinasyny we fiziologiýasyny öwreniş instituty geljekki kosmos uçuşlaryna taýýarlyk görmek maksady bilen, açlyk we ýatmak düzgünini barlamak üçin meýletinçileri gözleýär. Barlaga sagdyn durmuş ýörelgesine eýerýän 20–40 ýaş aralygyndaky erkek adamlar çagyrylýar. Bu barada Le Figaro neşiri habar berdi.
Ýewropa kosmos agentligi üçin geçirilýän bu synag jemi 20 gün dowam eder. Gatnaşyjylar onuň on gününde näme iş ýerine ýetirseler-de, (mysal üçin, kitap okasalar ýa-da kompýuterde bir zat görseler-de), ony ýatan ýerlerinde etmeli bolarlar. Olar alty gradus egrilikde goýlan düşekde kellelerini aşak bakdyryp ýatarlar. Munuň maksady — bedendäki suwuklyklary bedeniň ýokarky bölegine gönükdirmek arkaly kosmosdaky agramsyzlyk effektini döretmekdir.
Mundan başga-da, barlaga gatnaşyjylara iýmit babatda günde bary-ýogy 250 kaloriýa möçberli düýpli çäklendirme garaşýar.
Kosmos klinikasynyň ýolbaşçysy lukman Rebekka Biýett de Wilmer: «Olar diňe bir nahar çemçesi ary balyny, çorbany we miwe şiresi bilen iýmitlenip bilerler» diýip, ýagdaýy düşündirdi.
Gatnaşyjylar hemişelik gözegçilik astynda bolup, peşew we gan seljermeleri hem-de psihologik barlaglar ýaly köp sanly lukmançylyk testlerinden geçerler. Synaga gatnaşandygy üçin meýletinçileriň her birine 5 müň ýewro tölener.
Alymlaryň düşündirişine görä, iýmit çäklendirmesi uzak möhletli kosmos uçuşlaryndaky esasy meseleleriň biri bolmagynda galýar.
«Şeýle missiýalaryň dowamynda kosmonawtlar durmuş üpjünçilik ulgamynyň hatardan çykmagy, gorlaryň wagtynda doldurylmazlygy ýa-da uçuşyň möhlediniň uzalmagy ýaly garaşylmadyk ýagdaýlar sebäpli uzak wagtlap aç galmak pursatlary bilen ýüzbe-ýüz bolup bilerler» diýip, hünärmenler synagyň maksady barada gürrüň berýärler.
