Türkmenistanyň ilçisi Tailandyň Patyşasyna ynanç hatlaryny gowşurdy

10-njy fewralda Bangkok şäherinde Tailand Patyşasynyň Köşgünde (Amphorn Royal Palace) Türkmenistanyň Tailand Patyşalygyndaky Adatdan daşary we Doly ygtyýarly ilçisi (oturýan ýeri Kuala-Lumpur şäheri) M. Maşalow Tailandyň Patyşasy Maha Wajiralongkorna ynanç hatlaryny gowşurdy. Bu barada Türkmenistanyň DIM-niň metbugat gullugy habar berdi.
Ilçi ýurduň ýolbaşçylarynyň adyndan monarha mähirli salamlaryny we iň gowy arzuwlaryny ýetirdi. Tailandyň Patyşasy diplomaty täze wezipä bellenilmegi bilen gutlady we oňa işinde üstünlikler arzuw etdi, şeýle hem geljekde Türkmenistana sapar bilen barmak niýetiniň bardygyny belläp geçdi.
Söhbetdeşligiň dowamynda taraplar syýasy-diplomatik, söwda-ykdysady we medeni-ynsanperwer ugurlarda hyzmatdaşlygy ösdürmäge gyzyklanma bildirýändiklerini tassyklady.
Dabaradan soňra ilçi Tailandyň daşary işler ministri Sihasak Phuangketkeo bilen duşuşdy. Daşary syýasat edarasynyň ýolbaşçysy ilçiniň diplomatik işini goldamaga we zerur bolan ýardamlary bermäge taýýardyklaryny belledi.
Taraplar Türkmenistan bilen Tailandyň arasyndaky hyzmatdaşlygy mundan beýläk-de berkitmek üçin iki ýurduň daşary işler ministrlikleriniň arasynda yzygiderli gatnaşyklary saklamak barada ylalaşdy.