«Týudorlaryň ýüregi»: britanlar XVI asyr patyşa tumaryny saklap galmak üçin 3,5 million funt sterling toplady

Britan muzeýi týudorlar neslinden bolan patyşa Genrih VIII-e dahylly  altyn tumary saklap galmak we ony köpçülige görkezmäge elýeterli etmek üçin zerur bolan 3,5 million funt sterlingi toplamagy başardy. Bu barada Independent neşiri habar berýär.
«Týudorlaryň ýüregi» diýlip atlandyrylýan bu gymmatlyk Worwikşir graflygyndaky meýdanlaryň birinde metal detektorynyň kömegi bilen tapyldy. Bu şaý-sep patyşa Genrih VIII bilen onuň birinji aýaly Ketrin Aragonlynyň 24 ýyllyk nikasyndan galan ýeke-täk şaý-sepdir. Gymmatlygyň ýüzünde Týudorlar döwrüniň bägüli, Ketriniň simwoly bolan naryň şekili we köne fransuz dilinde ýazylan «elmydama» diýen söz şekillendirilipdir.

Britan muzeýiniň direktory doktor Nikolas Kullinan: «Bu ajaýyp tapyndy iňlis taryhynyň bize tanyş bolmadyk pursatlary barada gürrüň berýär. Men bu gymmatlygy ýakyn wagtda Beýik Britaniýanyň sergilerinde görkezmäge sabyrsyzlyk bilen garaşýaryn» diýip, tapyndynyň taryhy ähmiýetini düşündirýär.
Muzeý bu eksponaty köpçülikleýin kolleksiýada saklap galmak tamasy bilen halk köpçüliginden maddy goldaw sorady. 2025-nji ýylyň oktýabr aýynda başlanan bu çäräni on müňlerçe adam, şol sanda «Böriler diwany» («Wolf Hall») serialynda Genrih VIII-niň keşbini janlandyran aktýor Demian Lýuis hem goldady.
Muzeý hünärmenleriniň pikiriçe, Genrih VIII bu tumary 1518-nji ýyldaky ýaryş üçin ýörite ýasadypdyr. Şol ýaryşda olaryň gyzy Mariýa fransuz tagtynyň mirasdüşeri bilen dabaraly ýagdaýda adaglanypdyr.