Faraon Tutanhamonyň jaýlanan otagynyň gips diwary ilkinji gezek Luksor muzeýinde giň köpçülige görkezildi diýip, «The Independent» neşiri habar berýär.
Bu özboluşly artefakt ýaş hökümdaryň aramgähi tapylanyndan 100 ýyldan gowrak wagt geçenden soň köpçülige gökezmek üçin çykarylan ýeke-täk tapyndy boldy.
Bu diwar aramgäh bütinleý möhürlenmezden öň, ony talaňçylardan goramak maksady bilen gurlupdyr. Onuň ýüzünde jaýlamak däp-dessurlarynyň yzlary, şeýle hem Tutanhamonyň özüniň we nekropolyň goragçylarynyň resmi möhürleri saklanyp galypdyr.
«Bu Tutanhamonyň şu wagta çenli saklanyp galan we dünýäniň ozal hiç wagt görmedik ýeke-täk artefakty» diýip, Luksor şäheriniň Gadymy ýadygärlikler edarasynyň baş direktory Abdelgaffar Wagdi belledi.
Arheologlar şuňa meňzeş desgalaryň bütinleý bozulman saklanan görnüşini gaty seýrek tapýar, sebäbi Müsürdäki patyşalyk aramgähleriniň aglabasy entek gadymy döwürlerde talanypdyr. Emma 1922-nji ýylda Goward Karteriň ekspedisiýasy tarapyndan tapylan Tutanhamonyň aramgähi özüniň ilkinji durkuny diýen ýaly saklamagy başarypdyr.
