Dmitriý Şlapaçenko we Narine Saakýan Türkmenistanyň ýubileý medallary bilen sylaglandy

10-njy fewralda Türkmenistanyň Daşary işler ministrliginde ýurduň Bitaraplygynyň 30 ýyllygy mynasybetli döwlet sylaglaryny gowşurmak dabarasy boldy. Halkara guramalarynyň wekillerine «Türkmenistanyň Bitaraplygynyň 30 ýyllygyna» atly ýubileý medaly gowşuryldy.
Türkmenistanyň daşary işler ministri, wise-premýer Raşid Meredow Türkmenistanyň Prezidentiniň daşary ýurt raýatlaryny ýubileý medaly we ýadygärlik kümüş nyşany bilen sylaglamak hakyndaky Permanyny okady we dabaraly ýagdaýda sylaglary gowşurdy.
Bu ýokary sylaglara Birleşen Milletler Guramasynyň Türkmenistandaky hemişelik utgaşdyryjysy Dmitriý Şlapaçenko we BMG-niň Ösüş maksatnamasynyň Türkmenistandaky hemişelik wekili Narine Saakýan mynasyp boldy.
Dabarada çykyş edip, ministr Türkmenistanyň hemişelik Bitaraplyk syýasatynyň Halk Maslahatynyň Başlygy Gurbanguly Berdimuhamedowyň we Prezident Serdar Berdimuhamedowyň yzygiderli diplomatik tagallalary netijesinde halkara ykrarnamasyna eýe bolandygyny belledi.
Şeýle hem Türkmenistanyň hemişelik Bitaraplyk hukuk ýagdaýyna esaslanyp, dünýä döwletleri we halkara guramalary bilen hyzmatdaşlygy ösdürýändigi hem-de dürli ugurlarda bilelikdäki taslamalary amala aşyrýandygy nygtaldy. Daşary ýurt raýatlarynyň halkara hyzmatdaşlygyny berkitmäge, parahatçylyk we ynanyşmak syýasatyny öňe sürmäge goşan goşantlary aýratyn bellenildi.