Labubu oýunjaklarynyň ýyllyk satuwy 100 million birlikden geçdi

Hytaýyň dizaýner oýunjaklaryny öndürýän Pop Mart kompaniýasynyň habar bermegine görä, geçen ýylyň dowamynda Labubu brendi bilen öndürilen önümleriň satuwy 100 million birlikden geçdi. Bu barada «Lianhe Zaobao» neşirinde bellenilýär.
Kompaniýanyň esaslandyryjysy Wan Nin ýyllyk korporatiw ýygnagynda hasabat bilen çykyş edip, esasy operasion görkezijileri hödürledi. Onuň aýtmagyna görä, Labubu Pop Mart kompaniýasynyň flagman personažy bolmagynda galýar we dünýäniň dizaýner oýunjaklary bazarynda öňdebaryjy orunlary eýeleýär.
Hödürlenen maglumatlara görä, hasabat döwründe kompaniýanyň dürli intellektual hukuklar esasynda öndüren ähli önümleriniň umumy satuw möçberi 400 million birlikden geçdi. Pop Mart-yň resmi hasaba alnan müşderileriniň sany bolsa dünýä boýunça 100 million adama ýetdi. Kompaniýanyň işgärleriniň sany 10 müň adama çenli köpeldi.
Häzirki wagtda brend 100-den gowrak ýurtda we sebitde hödürlenýär. Pop Mart-yň düzümine 700 sany hususy bölek söwda dükany, şeýle hem alty sany iri önümçilik-logistika merkezi girýär.
Kompaniýanyň ýolbaşçylygy Pop Mart-yň işiniň ykdysadyýetiň degişli pudaklaryna hem ep-esli täsir edýändigini belledi. Hasaplamalara görä, ählumumy üpjünçilik zynjyrynyň we olar bilen baglanyşykly iş gurşawynyň çäginde kompaniýa 200 müňden gowrak adamy iş orny bilen üpjün etdi.