Ýaponiýada dolandyryjy partiýa saýlawlarda taryhdaky iň ýokary netijäni görkezdi

Premýer-ministr Sanae Takaitiniň ýolbaşçylyk edýän Ýaponiýanyň Liberal-demokratik partiýasy (LDP) parlamentdäki 465 orundan 316-syny eýeledi. Mundan ozal ol 198 orna eýedi.
Nikkei neşiriniň ýazmagyna görä, LDP Ikinji jahan urşy tamamlanaly bäri bir partiýanyň gazanan iň köp orun sanyna eýe boldy. Edil şonuň ýaly-da bu 1955-nji ýylda esaslandyrylan Liberal-demokratik partiýa üçin şu wagta çenli iň ýokary netijedir.
LDP bilen koalisiýa giren sagçy «Ýaponiýany dikeltmek partiýasy» parlamentde 36 orun aldy. «Komeýto» we Konstitusion-demokratik partiýasynyň oppozision birleşmesiniň bolsa parlamentdäki orny 172-den 49-a çenli azaldy.
Sanae Takaiti 2025-nji ýylyň 21-nji oktýabrynda Ýaponiýanyň premýer-ministri wezipesine girişdi. 23-nji ýanwarda ol parlamentiň aşaky palatasyny dargatdy we möhletinden öň saýlawlary yglan etdi. Premýer-ministr wezipesine girişenden soň, hanym Takaiti ykdysady ösüşi höweslendirmek üçin döwlet çykdajylaryny artdyrmak we milli howpsuzlyk babatda täze kanunlary kabul etmek niýetiniň bardygyny mälim edipdi.
LDP-niň parlament saýlawlaryndaky ýeňşine ýurduň içindäki hem-de Aziýa-Ýuwaş umman sebitindäki ýurtlaryň bazarlarynyň maýadarlary oňyn seslenendiler. Ýaponiýanyň öňdebaryjy kompaniýalarynyň aksiýalarynyň nyrhyny görkezýän Nikkei indeksi taryhy rekordyny täzeledi we 56 919 punkta (+4,9%) ýetdi.