Türkmenistanyň Prezidenti Pakistanyň ýolbaşçylaryna gynanç bildirdi

Türkmenistanyň Prezidenti Serdar Berdimuhamedow Pakistan Yslam Respublikasynyň Prezidenti Asif Ali Zardarä hem-de Premýer-ministri Mian Muhammad Şahbaz Şarife Yslamabat şäherindäki metjitde bolup geçen, köp sanly adam pidalaryna we şikes ýetmelere getiren partlama zerarly gynanç hatyny iberdi. Bu barada TDH döwlet habarlar agentligi habar berdi.
«Türkmenistan terrorçylygyň we ekstremizmiň islendik ýüze çykmalaryny juda aýgytly ýagdaýda ýazgarmak bilen, bu apata garşy göreşmek hem-de ony ýok etmek işinde dünýä bileleşiginiň tagallalaryny doly goldaýar» diýlip hatda bellenilýär.
Serdar Berdimuhamedow şu kynçylykly pursatda gurban bolanlaryň dogan-garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle-de hut öz adyndan ýürekden gynanjyny, medet beriji sözlerini beýan etdi. Şeýle hem ejir çekenleriň tiz wagtda sagalmaklary baradaky dilegler beýan edildi.
Pakistanyň paýtagtyndaky metjitde partlama geçen hepde juma namazy wagtynda boldy. Soňky maglumatlara görä, onuň netijesinde azyndan 31 adam wepat bolup, 150-den gowrak adam dürli derejelerde şikes aldy.