Ilkinji subutnama! Ispaniýada Gannibalyň goşunyna degişli söweşjeň piliň süňki tapyldy

Ispaniýanyň günortasynda arheologlar Gannibalyň goşunyna degişli söweşjeň piliň süňküni tapdylar. Bu tapyndy Ikinji Puni urşunda şol haýwanlaryň ulanylandygynyň ilkinji gönümel hem maddy subutnamasy boldy.
Süňk, aslynda 2020-nji ýylda gadymky Kordobadaky Kolina-de-los-Kemados şäherçesindäki köne iberiýa obasynyň ýykyk diwarynyň aşagyndan tapylypdy. Şol gatlakda süňk bilen bile daşdan ýasalan 12 sany gülle we teňňelerem tapyldy. Hut şular hem bu ýerde Ikinji Puni urşuna degişli harby çaknyşygyň bolup geçendigini görkezýär.
Journal of Archaeological Science: Reports žurnalynda neşir edilen barlag bu tapyndynyň uly piliň sag öň aýagyndaky baldyr süňküdigini anyklady. Radiouglerod seljermesi süňküň ýaşynyň biziň eýýamymyzdan oňki IV we III asyrlaryň arasyna degişlidigini görkezdi. Bu bolsa Gannibalyň uruşlarynyň hronologiýasyna doly laýyk gelýär.
Taksonomik seljerme piliň Afrika tokaý pili bolmak ähtimallygyny öňe sürýär. Ol piller  sawanna we Aziýa pillerinden has kiçi bolupdyrlar. Tapyndynyň ýüze çykan ýagdaýy haýwanyň ol ýerde olja ýa-da çig mal hökmünde däl-de, hut söweşleriň dowamynda wepat bolandygyny çaklamaga esas berýär.
Bu açyş, Ikinji Puni urşy döwri Pireneý ýarymadasynda, mümkingadar Karfageniň goşunynyň düzüminde söweşjeň pilleriň bolandygynyň ilkinji anatomik subutnamasydyr.