Paleontologlar Kanadanyň Makkenzi daglarynda ýaşy, takmynan, 567 million ýyla barabar bolan gadymy deňiz organizmleriniň daşa öwrülen galyndylaryny tapdy. Ylmy barlagyň netijeleri «Science Advances» žurnalynda çap edildi.
Alymlar Ediakar döwrüniň, ýagny Ýeriň taryhynda ilkinji iri köpöýjükli organizmleriň peýda bolan döwri bolup, 635-den 538 million ýyla çenli dowam eden tapgyryň tapyndylaryny öwrendi.
Kanadada tapylan daşa öwrülen galyndylar Russiýadaky we Awstraliýadaky tapyndylar bilen mälim bolan Ak deňiz faunasynyň wekillerine meňzeş bolup çykdy. Şeýle-de bolsa, Kanadada tapylan nusgalaryň ýaşy has uly bolup, mundan ozal öwrenilen organizmleriň 560–550 million ýyllyk ýaşyna garanyňda, bular 567–566 million ýyla barabardyr.
Şeýle hem gözlegçiler bu gadymy jandarlaryň mundan ozal şeýle ekoulgamlar üçin çaklanylyşy ýaly ýalpak suwlarda däl-de, eýsem has çuň suwlarda ýaşandyklary baradaky netijä geldi.
Ylmy işiň awtorlarynyň aýtmagyna görä, bu ýagdaý irki ekoulgamlaryň has giň çäklere ýaýrandygyny we olaryň dürli gurşaw şertlerine uýgunlaşmaga ukyply bolandygyny görkezýär. Alymlar ilkinji çylşyrymly janly-jandar jemgyýetleriniň şertleriň has durnukly bolan çuň suwlarynda ýüze çykandygyny, şondan soň kem-kemden kenarýaka sebitlerine ýaýrandygyny çaklaýar.
Alymlar täze maglumatlaryň haýwanat dünýäsiniň ewolýusiýasynyň, ýagny ösüş tapgyrlarynyň arasynda birden böküş bolman, yzygiderli häsiýete eýe bolandygyny subut edýändigini belleýär.
