Colossal Biosciences biotehnologiýa kompaniýasy ýok bolup giden haýwan görnüşlerini dikeltmek ugrunda uly öňegidişlik gazanandygyny yglan etdi. «The Guardian» neşiriniň ýazmagyna görä, alymlar emeli ýumurtgalary döretdi we olardan sagdyn jüýjeler üstünlikli çykdy.
Bu taslamany taýýarlamak, takmynan, iki ýyl wagt aldy we kompaniýanyň tassyklamagyna görä, geljekde täze tehnologiýa Täze Zelandiýada ýaşap, takmynan, 600 ýyl ozal ýok bolup giden ägirt uly moa guşuny gaýtadan «direltmäge» kömek eder.
Moa guşunyň boýy üç metrden, agramy bolsa 200 kilogramdan geçipdir we olaryň ýumurtgalary adaty towuk ýumurtgasyndan, takmynan, 80 esse uly bolupdyr. Kompaniýanyň baş biology, professor Endrýu Paskyň sözlerine görä, olaryň silikon membrananyň esasynda döreden emeli inkubasiýa ulgamy biologik taýdan doly takykdyr we islendik ölçege görä ulaldylyp bilinýär.
Muňa garamazdan, alymlar uly kynçylyk bilen ýüzbe-ýüz bolýar: geçen asyrlaryň dowamynda moa guşunyň DNK bölekleri güýçli dargapdyr, bu bolsa doly genomy gaýtadan dikeltmegi iş ýüzünde mümkin däl diýen ýaly edýär.
Ylmy jemgyýetçilikde bu täze açyş dürli jedelleri döredýär. Ewolýusion genetik Luiza Jonson jikme-jik maglumatlary bolan we hünärmenler tarapyndan syn berlen resmi ylmy neşir bolmazdan, şeýle tassyklamalary ylmy taýdan esaslandyrylan diýip hasaplap bolmajakdygyny belledi. Öz gezeginde, Barselonanyň Tebigy ylymlar muzeýiniň direktory Karles Laluesa-Foks taslamanyň ekologik ähmiýetine şübheli garap, kompaniýanyň işinde «ylmy açyşlar bilen mahabatyň geň galdyryjy garyndysynyň» bardygyny nygtady.
