Dubaýda "Dubai Loop" atly ýokary tizlikli ýerasty ýol ulgamynyň ilkinji dört stansiýasynyň taslamasy tanyşdyryldy.
Ulag girişleri Burj Khalifa gökdiräniniň ýanynda, DIFC 2 işewürlik etrabynda, Dubai Mall Zabeel awtoduralgasynda we Brookfield Place halkara ulag terminalynda ýerleşer. "The National" neşiriniň habar bermegine görä, bu taslamany Maskyň eýelik edýän "The Boring Company" tunnel gurluşyk kompaniýasy işläp düzdi.
Dubaýyň Ýol we ulag müdiriýeti (RTA) taslamanyň birinji tapgyrynyň 565 million dirheme ($153,8 million) düşjekdigini mälim etdi. Ýerasty ýol DIFC-ni Dubai Mall söwda merkezi bilen birleşdirer. Gurluşykçynyň berýän maglumatyna görä, bu bölekde işler 2026-njy ýylyň ahyrynda başlar we bir ýyllap dowam eder. Tunneliň gurulmagy ýol wagtyny 20 minutdan 3 minuda çenli gysgaltmaga mümkinçilik berer.
Umumy uzynlygy 22,2 kilometr bolan tutuş ulgam 19 stansiýadan ybarat bolar. Taslamanyň umumy bahasy 2 milliard dirheme ($545 million) deňdir. Ýolagçylary gatnatmak üçin Tesla awtoulaglary ulanylar; olar başda sürüjiler tarapyndan dolandyrylar, geljekde bolsa doly awtonom (öz-özüni dolandyrýan) ýagdaýa geçiriler.
Ulgamyň başlangyç tapgyrda günde 13 müň adamy gatnatmagyna, soňra bolsa bu görkezijiniň 30 müňe çenli ýetirilmegine garaşylýar. Işleriň doly tamamlanmagy üçin üç ýyl wagt meýilleşdirilýär.
Dubaýyň bu taslamasynyň çäklerinde dünýäde eýýäm öz rekordçylary bar: Hytaýda ýakynda 22,13 kilometrlik "Tianshan Shengli" tunneli açyldy, dünýäniň iň uzyn tunneli bolsa Norwegiýadaky Lerdal tunneli bolmagynda galýar — ol Hytaýdakydan 2,38 km has uzundyr.
