Raşid Meredow Dubaýda ählumumy dolandyryş boýunça Türkmenistanyň ileri tutýan ugurlaryny açyp görkezdi

Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow Dubaýda (BAE) geçirilýän «Bütindünýä hökümet sammiti – 2026» forumynda çykyş edip, dünýäde dowam edýän krizis şertlerinde ählumumy dolandyryşy we halkara hyzmatdaşlygyny ösdürmek boýunça ýurduň garaýyşlaryny beýan etdi. Ministriň çykyşynyň doly teksti daşary syýasat edarasynyň saýtynda ýerleşdirildi.
«Häzirki wagtda ählumumy dolandyryş we netijeli ýolbaşçylyk meseleleri halkara hyzmatdaşlyklaryň we bileleşikleriň ulgamyny düýpli özgerdýän barha artýan ählumumy täzeleniş şertlerinde ara alnyp maslahatlaşylýar» – diýmek bilen, türkmen diplomatiýasynyň ýolbaşçysy dünýäniň geosyýasy, ykdysady, howa we tehnologik krizisleriň utgaşykly täsirine sezewar bolýandygyny belledi.
Onuň sözlerine görä, hyzmatdaşlygyň netijeliligi öňünden çaklap bilmek ukybyna baglydyr. «Biz netijeli hyzmatdaşlygyň we durnukly hyzmatdaşlyk gatnaşyklarynyň jogapkärçilikden, öňünden çaklamakdan we halkara kadalaryna hormat goýmakdan başlanýandygyna düşünýäris» – diýip, ministr mälim etdi.
Amaly başlangyçlar barada durup geçmek bilen, Raşid Meredow öňüni alyş döwlet dolandyryşyna geçmegiň zerurdygyny nygtady.
«Biziň pikirimizçe, irki duýduryş gurallarynyň, öňüni alyş usullaryň we dolandyryş çözgütleriniň alyş-çalyş edilmegine gönükdirilen Öňüni alyş döwlet dolandyryşynyň köptaraplaýyn platformasyny döretmek howplaryň ýitileşen ýagdaýlara öwrülmezden öň azaldylmagyna we hyzmatdaşlaryň arasynda ynanyşmagyň bozulmagynyň öňüni almaga ýardam berip biler» – diýip, ol belledi.
Halkara hukugy baradaky meselä hem aýratyn üns berildi. Ministr Türkmenistanyň BMG-de 2028-nji ýyly «Halkara hukugyň ýyly» diýip yglan etmek başlangyjyny öňe sürýändigini ýatlatdy. «Bu başlangyjyň maksady öňden bar bolan hukuk binýadyna hormaty berkitmekden we dikeltmekden, onuň hemmetaraplaýyn we bölünmez häsiýetini üpjün etmekden ybaratdyr» – diýip, R. Meredow nygtady.
Ileri tutulýan ugurlaryň hatarynda maglumatlaryň ygtybarlylygynyň umumy ýörelgelerini öňe sürmek we döwlet hem-de halkara syýasatyny işläp taýýarlamakda we durmuşa geçirmekde olaryň bilelikdäki tassyklaýyş gurallaryny döretmek bellenildi. Ministriň sözlerine görä, şeýle çemeleşmeler ynamy berkidýär we sanly gurallary ulanmakda jogapkärçiligi artdyrýar.
Çykyşynyň ahyrynda Raşid Meredow sammitiň Dubaýda ýokary derejede guralandygy üçin BAE-niň ýolbaşçylaryna minnetdarlyk bildirdi we «XXI asyrda ýolbaşçylyk we bileleşikler agalyk etmek ukyby bilen däl-de, öňünden çaklap bilmek, ynamy berkitmek we umumy kadalaryň berjaý edilmegini üpjün etmek ukyby bilen kesgitlenilýär» – diýip belledi.