Türkmenistanyň wekiliýeti Dubaýda geçirilýän Bütindünýä hökümet sammitine gatnaşýar

Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň ýolbaşçylygyndaky wekiliýet 2026-njy ýylyň 3-5-nji fewraly aralygynda Dubaýda geçirilýän Bütindünýä hökümet sammitine gatnaşýar.
Sammitiň işine 30-dan gowrak döwlet we hökümet baştutanlary, 150 hökümet wekiliýeti we 6 müňe golaý gatnaşyjy gatnaşýar. Olaryň arasynda halkara kompaniýalaryň ýolbaşçylary, maliýe guramalarynyň we bilim edaralarynyň wekilleri bar.
Gün tertibiniň esasy mowzuklary ählumumy dolandyryş meseleleri, emeli aň tehnologiýalarynyň ösüşi, howanyň üýtgemegi, şeýle hem ykdysady meseleleri çözmekde utgaşykly çemeleşmeler bilen baglydyr.
«Ählumumy bileleşikleriň geljegi» atly sessiýada çykyş etmek bilen, Raşid Meredow häzirkizaman dünýäsiniň möhüm meselelerini çözmekde Türkmenistanyň çemeleşmesini beýan etdi. Ýurduň durnukly ösüş maksady bilen halkara hukugyna, özara hormat goýmaga we ähli taraplaryň bähbitlerini nazara almaga esaslanýan utgaşykly gatnaşyklaryň tarapdary hökmünde çykyş edýändigi bellenildi.
Türkmen wekiliýetiniň ýolbaşçysy bu çemeleşmäniň iş ýüzünde durmuşa geçirilýändigini nygtady we Türkmenistanyň 2028-nji ýyly «Halkara hukugyň ýyly» diýip yglan etmek baradaky başlangyjyny ýatlatdy. R. Meredow Türkmenistanyň jogapkärli çemeleşmä, öňünden çaklama we açyklyga çagyrmak bilen, netijeli köptaraplaýyn hyzmatdaşlygy goldaýandygyny mälim etdi.
Çykyşynyň dowamynda diplomat hyzmatdaşlygy ösdürmegiň anyk gurallaryny, şol sanda netijeli döwlet dolandyryşyny, bilermenleriň tejribe alyş-çalşygyny we özara baglanyşyk arkaly ýurtlaryň ykdysady mümkinçiliklerini açmagyň ýollaryny beýan etdi.
Bütindünýä hökümet sammitiniň işi dowam edýär.