Hyundai Motor Company we Kia Corporation kompaniýalary daş-töwerekdäki obýektlere hakyky wagt tertibinde gözegçilik etmek üçin ultra giň zolakly aragatnaşyk (UWB) tehnologiýasyna esaslanýan «Vision Pulse» howpsuzlyk ulgamyny işläp düzdüler.
Täze toplum 100 metr aralykdaky päsgelçilikleriň we adamlaryň ýerleşýän ýerini 10 sm takyklyk bilen kesgitlemäge ukyplydyr.
Ulgam awtoulagyň modullary bilen oňa laýyk gelýän ykjam enjamlaryň arasyndaky özara signal çalşygyna esaslanýar.
«Vision Pulse» gijeki wagtda we ýaramaz howa şertlerinde öz netijeliligini 99% derejesinde saklaýar. Signalyň gijikdirilme wagty bary-ýogy 1–5 ms aralygyndadyr.
Bu innowasiýanyň iň uly aýratynlygy — «Digital Key 2» (sanly açar) ulgamy bolan ulaglara goşmaça enjam gurnamagyň zerurlygy ýokdur.
Bu täzelik sürüjä kömekçi ulgamlarda (ADAS) ulanylýan lidarlaryň we radarlaryň ornuny bölekleýin eýelemäge mümkinçilik berýär.
Häzirki wagtda tehnologiýa Kia-nyň Hwasondaky merkezinde ýük göteriji tehnikalaryň gatnaşmagyndaky hadysalaryň öňüni almak üçin synagdan geçirilýär. Indiki synaglaryň bolsa Busan portunda geçirilmegi meýilleşdirilýär.
Bu ulgamyň seriýalaýyn öndürilýän awtoulaglara haçan ornaşdyryljakdygy barada häzirlikçe takyk maglumat berilmedi.
