Wenesiýada karnawal geçirilýär

Wenesiýada däp bolan karnawal dowam edýär. Bu ýylky dabara üçin, açylyşy 6-njy fewrala meýilleşdirilýän Milandaky gyşky Olimpiýa oýunlary bilen utgaşykly «Olimp — oýunlaryň gözbaşy» diýen şygar saýlanyp alyndy.
«Guramaçylar sport temasynyň karnawal medeniýetinden hiç wagt hem üzňe bolmandygyny belleýärler» diýip, Euronews habar berýär.
Baýramçylygyň açylyşy Grand-kanalda suwdaky ýöriş bilen başlandy. Oňa Wenesiýanyň nyşany bolan alaka görnüşindäki uly gaýyk baştutanlyk etdi. Gaýygyň üstünde karnawal lybaslaryndaky artistler çykyş etdiler. Rialto köprüsiniň ýanynda parada gatnaşyjylar howa şarlaryny, lentalary we konfettileri asmana uçurdylar. Kanalyň boýuna ýygnanan müňlerçe tomaşaçy bu täsin pursatlary höwes bilen synlady.
Karnawal günlerinde şäheriň merkezinde «gyzyl zolaklar» döredildi, polisiýa gözegçiligi güýçlendirildi we jübikeserligiň öňüni almak üçin çäreler berkidildi. Geçen ýyl karnawala takmynan bir million adam gelipdi. Häkimýetler bu möwsümde hem şonçarak myhmana garaşýar.
31-nji ýanwarda başlanan Wenesiýa karnawaly 17-nji fewrala çenli dowam eder.



Wenesiýa karnawalynyň taryhy takmynan müň ýyla uzaýar. Karnawal hakyndaky ilkinji maglumatlar 1094-nji ýyla degişlidir, emma XIII—XIV asyrlara çenli adamlar onda nykap dakynmandyr. Aslynda şol döwürlerde ýüzüňe nykap dakylmagyň esasy maksady, jemgyýetçilik gatlaklarynyň arasyndaky serhetleri bozmakdan ybarat bolupdyr. Çünki hut şonuň üsti bilen, iň bolman, karnawal wagtynda adamlaryň arasynda deňlik bolupdyr - hyzmatkärler özüni asylzada ýaly, pukara-bendeler bolsa gurply kişiler ýaly alyp baryp bilýän ekeni.