Apple kompaniýasy 2025-nji ýylyň 27-nji dekabrynda tamamlanan täze maliýe ýylynyň birinji çärýeginiň netijeleri boýunça 143,8 milliard dollar girdeji gazanyp, öz taryhynda rekord goýdy. Bu görkeziji geçen ýylyň degişli döwri bilen deňeşdirilende 16% köpdür we seljerijileriň çaklamalaryndan has ýokarydyr.
Maliýe hasabatyna görä, kompaniýanyň iş girdejisi geçen ýylky 42,8 milliard dollardan 50,9 milliard dollara, arassa girdejisi bolsa 42,1 milliard dollara ýetdi. Şeýle hem, Apple-iň dünýä boýunça ulanylýan işjeň enjamlarynyň bazasynyň häzirki wagtda 2,5 milliarddan geçendigi habar berildi.
Smartfonlar kompaniýanyň iň uly girdeji diregleri bolmagynda galýar. iPhone satuwy geçen ýylky 69,1 milliard dollardan 85,3 milliard dollara çenli ýokarlandy we umumy girdejiniň ýarysyndan gowragyny üpjün etdi.
Hyzmatlar pudagynda (App Store, iCloud, Apple Music) hem uly ösüş hasaba alyndy we bu segment 30 milliard dollar girdeji getirdi. Gyzykly tarapy, diňe hyzmatlardan gelýän girdeji, iPhone-dan başga ähli önüm kategoriýalarynyň jemi girdejisinden hem geçmegi başardy. Şeýle hem, iPad segmenti 8,6 milliard dollar girdeji bilen oňyn ösüş görkezdi.
Emma ähli ugurlarda ösüş bolmady. Mac kompýuterleriniň satuwy birneme peselip, 8,4 milliard dollar boldy. Şeýle-de, dakylýan enjamlar, öý ulgamlary we aksessuarlar kategoriýasy 11,5 milliard dollar bilen çäklenip, az-kem pese gaçyş görkezdi.
