Şu ýylyň mart aýynda Daşoguz welaýatynda «Dünýäde ýaňlanýar ajap dessanym, toý tutýar Garaşsyz Türkmenistanym» atly festiwal geçiriler. Bu medeni çärä görülýän taýýarlyk barada 30-njy ýanwarda geçirilen Hökümet mejlisiniň dowamynda Ministrler Kabinetiniň Başlygynyň orunbasary B.Seýidowa hasabat berdi. Bu barada «Watan» habarlar gepleşiginde habar berildi.
Meýilnama laýyklykda, festiwala ýurduň dessançy bagşylarynyň, sazandalarynyň, medeniýet ugurly okuw mekdepleriniň mugallymlarynyň we talyplarynyň gatnaşmaklary meýilleşdirilýär. Medeni çäräniň çäklerinde «Dessançy bagşylar joşa gelende» atly ylmy-amaly maslahatyň, «Bagşy dessan aýdanda» atly konsertiň, halypa dessançy bagşylaryň ussatlyk sapaklarynyň hem-de türkmen halkynyň Milli Lideri Gurbanguly Berdimuhamedowyň «Ile döwlet geler bolsa...» atly kitabynda beýan edilýän dessançylyk ýoluna bagyşlanan döredijilik duşuşyklarynyň geçirilmegi göz öňünde tutulýar.
Şunuň bilen baglylykda, wise-premýer Türkmenistanyň Prezidentiniň garamagyna degişli teklibi hödürledi.
Döwlet Baştutany Daşoguz welaýatynda geçiriljek festiwala hem-de ylmy-amaly maslahata düýpli taýýarlyk görmegi we olary ýokary derejede geçirmegi wise-premýere tabşyrdy.
Daşoguzda dessançy bagşy-sazandalaryň festiwaly geçiriler
- 31.01.2026 01:25
- 1.4k+
