Magtymguly Pyragynyň çagalygy barada «Arzyman» ady bilen täze film düşürildi

Magtymguly Pyraga bagyşlanan «Arzyman» filmi häzirki wagtda montaž tapgyryndan geçýär. Şahyryň ykbaly we mirasy baradaky täze kino eserini režissýor, ssenariçi hem-de «Mekanfilm» studiýasynyň esaslandyryjysy Çaryýar Seýidow düşürdi.
Beýik türkmen şahyry barada köp sanly filmler, şol sanda 2024-nji ýylda Pyragynyň 300 ýyllygy Türkmenistanda we daşary ýurtlarda giňden bellenilenden soň täze eserler döredildi. Emma täze filmiň adaty biografik filmlerden esasy tapawudy — «Arzymanyň» geljekki akyldaryň çagalyk ýyllaryna üns bermegidir. Sýužetiň merkezinde oba durmuşynda ýaşaýan oglanjyk, onuň gündelik durmuşy, ilkinji synaglary we dünýäni şahyrana kabul edişiniň başlangyç pursatlary durýar.
Filmi düşürmek işlerine taýýarlyk arhiw maglumatlaryny öwrenmekden başlandy. Soňra döredijilik topary Balkan welaýatynda, şahyryň dogduk mekany bolan Gerkez obasynda işlerini dowam etdirdi. Kiçi Balkanyň daglary we tebigy gowaklary esasy ýerler bolup hyzmat etdi.
«Filmiň “Arzyman” ady “arzuw edilen” diýen manyny berýär. Şeýle-de, bu at filmiň ruhuna öwrülen milli sazymyzyň adydyr» diýip, Çaryýar Seýidow gürrüň berýär.
Filme Türkmenistanyň halk artisti Öwez Gelenow, Gülnabat Abdullaýewa, Mekan Jumabaýew we beýleki aktýorlar gatnaşdy. Kiçijik Magtymgulynyň keşbini mekdep okuwçysy Deňizhan Abdyrahmanow ýerine ýetirdi.
Filmiň üstündäki işleri 27-nji iýuna — ýurtda bellenilýän Medeniýet we sungat işgärleriniň hem-de Magtymguly Pyragynyň şygryýet gününe çenli tamamlamak meýilleşdirilýär.