Matematikler emeli aňyň adam paýhasyndan öňe geçmejegini subut etdiler

Emeli aňyň başarnyklary hernäçe öwülse-de, bu gün matematiki subutnamalar uly dil modelleriniň (LLM) belli bir çylşyrymlylyk derejesinden ýokary wezipeleri ýerine ýetirmäge ukypsyzdygyny tassyklaýar. Matematik-alymlar Wişal we Warin Sikka tarapyndan geçirilen barlag  hem emeli aň agentleriniň awtonom ýagdaýda adamdan öňe geçmäge päsgel berýän nazary böwet bilen ýüzbe-ýüz bolýandygyny giňişleýin subut edýär.
Ylmy işiň awtorlary belli bir görkezmeleri ýerine ýetirmek üçin emeli aňyň işläp biljek güýjünden has çylşyrymly hasaplamalaryň talap edilýändigini düşündirýärler. Şeýle ýagdaýlarda algoritmlar ýa amaly tamamlap bilmeýärler, ýa-da ýalňyşlyklara ýol berýärler. Bu netijeler EA pudagynyň umumy emeli aňy (AGI) döretmek üçin maglumatlaryň göwrümini çäksiz derejede  artdyrmaga esaslanýan strategiýasyna şübhe döredýär.
Barlaga görä, matematik hasaplamalar tehnologiýanyň mümkinçilikleriniň çägini belgileýär we bu çäk degişli kompaniýalaryň çaklamalaryndan ep-esli pesdir. Mundan ozal Apple kompaniýasynyň barlagçylary hem LLM-leriň hakyky pikirlenme ukybynyň ýokdugyny belläp, olary diňe sözleri öňünden çaklaýan algoritmler diýip atlandyrypdylar. Cognitive Resonance kompaniýasynyň esaslandyryjysy Bendjamin Raýli hem LLM-leriň kesgitlenen iş ýörelgeleri sebäpli hiç wagt biziň «paýhas» diýip hasaplaýan derejämize ýetip bilmejekdigini aýdypdy.
Sikkanyň ylmy işi hasaplama güýjüniň nazary çäklerini diňe bar bolan ulgamlaryň möçberini artdyrmak arkaly ýeňip geçip bolmajakdygyny tassyklaýar.