Singapur emeli aňy ösdürmek üçin 786 million dollardan gowrak serişde sarp eder

Singapur emeli aň ulgamynda gözlegleri we işläp taýýarlamalary maliýeleşdirmegiň Milli meýilnamasyna (NAIRD) 1 mlrd Singapur dollaryndan ($786 mln) gowrak serişde gönükdirer. Bu barada Singapuryň Sanly ösüş we maglumat ministrligi (MDDI) habar berýär diýip, Channel News Asia belleýär.
Maliýe serişdeleri 2025-nji we 2030-njy ýyllar aralygynda bölünip berler we olar döwletiň emeli aň ulgamynda mümkinçiliklerini berkitmäge gönükdiriler.
Bu başlangyç MDDI-niň ýolbaşçysy Jozefin Teo tarapyndan yglan edildi we täzelenen National AI Strategy 2.0 milli strategiýasynyň çäklerinde durmuşa geçirilýär. Emeli aň ulgamynda ilkinji strategiýa 2019-njy ýylda kabul edilip, bilim, saglygy goraýyş, logistika we howpsuzlyk pudaklaryndaky taslamalar üçin esas boldy. NAIS 2.0 wersiýasy EA pudagynda hünärmenleriň sanyny 15 müň adama ýetirmek we işläp düzüjiler üçin oňyn şertleri döretmek maksady bilen 2023-nji ýylda hödürlendi.
Bu maýa goýumlar Singapuryň Milli gözleg gaznasynyň 2025-nji ýylyň dekabrynda yglan edilen 37 mlrd Singapur dollary möçberindäki has uly maksatnamasynyň bir bölegidir. Mundan bir ýyl ozal tehnologik ösüş üçin ýene 28 mlrd Singapur dollary bölünip berlipdi.
NAIRD meýilnamasy emeli aň ulgamynda düýpli we amaly gözlegleri ösdürmegi, şeýle-de hünärmenleri çekmegi we taýýarlamagy göz öňünde tutýar. Ýurtda ýerli we daşary ýurtly bilermenleriň gatnaşmagynda gözleg merkezleri dörediler. Olaryň işi uzak möhletleýin wezipelere, emeli aňyň howpsuzlyk meselelerine, hyýanatçylykly ulanylyşlaryň öňüni almaga we uniwersal EA-ulgamlaryny döretmäge gönükdiriler. Şeýle-de, meýilnama ylmy işläp taýýarlamalardan ykdysadyýetde iş ýüzünde ulanmaga geçişi çaltlaşdyrmagy maksat edinýär.