ÝUNISEF Türkmenistanda çagalaryň hukuklaryny ilerletmek üçin täze Ýurt Maksatnamasyny işe girizýär

ÝUNISEF Türkmenistanyň Hökümeti bilen hyzmatdaşlykda 2026–2030-njy ýyllar üçin täze Ýurt Maksatnamasyny resmi taýdan işe girizdi. Bu ädim her bir çaganyň sagdyn bolmagyny, bilim almagyny we howpsuzlygyny üpjün etmäge gönükdirilendir.
Maksatnama milli ösüşiň ileri tutulýan ugurlaryna, Türkmenistanda çagalaryň hukuklaryny durmuşa geçirmek boýunça Hereketleriň Milli Meýilnamasyna (2023-2028-nji ýyllar) we Durnukly ösüş maksatlaryna esaslanmak bilen, Hökümetiň çagalaryň hukuklaryny goramaga ygrarlylygyny görkezýär.
Geljek bäş ýylyň dowamynda bilelikdäki tagallalar enäniň we çaganyň saglygyny goramak ulgamyny berkitmäge, inklýuziw we ýokary hilli bilimi ornaşdyrmaga, şeýle hem çagalaryň goragyna we zorlugyň öňüni almaga gönükdiriler. Täze maksatnamada klimat durnuklylygy meselelerine we çagalary häzirki hem geljekki adatdan daşary ýagdaýlardan goramak üçin maksatnamalara aýratyn üns berilýär.
ÝUNISEF-iň Türkmenistandaky wekili Jalpa Ratna täze maksatnamanyň Hökümetiň çagalara gatnaşykda öňdebaryjylygyna esaslanýandygyny we raýat jemgyýeti hem-de ýaşlar, ene-atalar bilen ýakyndan hyzmatdaşlyk etmek arkaly uzak möhletleýin netijeleri gazanmaga gönükdirilendigini belledi.
Geljekki tapgyryň üstünligi 2021–2025-nji ýyllar üçin niýetlenen maksatnamanyň gazananlaryna esaslanýar. Bu döwürde ýurtda immunizasiýa bilen gurşap almak görkezijisi durnukly ýagdaýda 95%-den ýokary boldy, 80 000-den gowrak çaga bolsa synag lukmançylyk merkezlerinde irki ösüş hyzmatlary berildi.
Şeýle-de, öňki ýyllaryň möhüm netijeleriniň biri unuň witamin-mineral goşundylary bilen baýlaşdyrylmagy we 7000-den gowrak maşgala, şol sanda maýyplygy bolan adamlara toplumlaýyn durmuş goldawynyň berilmegidir. Täze strategiýanyň çäklerinde ÝUNISEF Türkmenistana netijeli çözgütleri giňeltmekde, deňsizligi aradan aýyrmakda we ýüze çykýan kynçylyklara garşy durmak üçin milli ulgamlary berkitmekde goldaw bermegini dowam etdirer.