Hytaýda awtoulaglaryň täze nesil rul dolandyryş ulgamlary üçin hökmany talaplar tassyklanyldy. Hytaý Halk Respublikasynyň Bazary düzgünleşdirmek boýunça döwlet müdirligi 1-nji iýuldan güýje girjek "Awtoulaglaryň rul ulgamlaryna bildirilýän esasy talaplar" atly milli standarty çap etdi.
Bu resminama ilkinji gezek "steer-by-wire" (sim arkaly dolandyryş) ulgamyny jikme-jik düzgünleşdirýär. Bu tehnologiýada tekerleriň öwrülmegi elektronika arkaly amala aşyrylýar we rul bilen şassiniň arasynda gönüden-göni mehaniki baglanyşyk bolmaýar. Şeýle awtoulaglarda dolandyryş doly elektron komponentlerine we programma üpjünçiligine daýanýar.
Bu standart doly elektron ulgamlara, şeýle hem elektron kömekçi modullary bolan adaty rul mehanizmlerine degişlidir.
Resminamada funksional howpsuzlyk kadalary, elektrik üpjünçiliginde ýa-da dolandyryş signallarynyň geçirişinde näsazlyk ýüze çykanda görülmeli çäreler beýan edilýär.
Ulgamyň işinde bökdençlik dörände, sürüjä habar bermegiň usullary we programma üpjünçiliginiň ygtybarlylygy aýratyn göz öňünde tutulýar.
Kompaniýasynyň çaklamasyna görä, şeýle ulgamlaryň global bazary 2025-nji ýyldaky 4,61 milliard dollardan, 2031-nji ýyla çenli 7,21 milliard dollara çenli öser. Hytaýda bu tehnologiýa eýýäm köpçülikleýin öndürilýän awtoulaglarda ulanylyp başlandy; muňa ilkinji mysallaryň biri hökmünde Nio ET9 modelini görkezmek bolar.
