Türkmenistan we Italiýa bilim ulgamynda hyzmatdaşlygyň täze ugurlaryny ara alyp maslahatlaşýar

Türkmenistanyň bilim ministri Jumamyrat Gurbangeldiýew Italiýanyň Türkmenistandaky Adatdan daşary we Doly ygtyýarly ilçisi Luiji Ferrari bilen duşuşyk geçirdi. Duşuşygyň dowamynda taraplar bilim ulgamyndaky ikitaraplaýyn hyzmatdaşlygyň häzirki ýagdaýyny we geljekki ugurlaryny ara alyp maslahatlaşdy.
Türkmen tarapy iki ýurduň arasyndaky dialogy ösdürmekde bilimiň esasy ugurlaryň biri hökmünde ähmiýetini belledi. Türkmenistanda milli bilim ulgamynyň yzygiderli kämilleşdirilýändigi, ýurdumyzyň ýokary okuw mekdepleriniň bolsa Türkmenistanyň 2052-nji ýyla çenli durmuş-ykdysady ösüş Maksatnamasyna laýyklykda, daşary ýurtly hyzmatdaşlar bilen özara gatnaşyklary giňeldýändigi nygtaldy.
Söhbetdeşligiň dowamynda Halkara parahatçylyk we ynanyşmak ýylyna, Halkara bitaraplyk gününe hem-de Türkmenistanyň hemişelik bitaraplygynyň 30 ýyllygyna bagyşlanan halkara çäreleriň çäklerindäki soňky duşuşyklar bilen baglylykda türkmen-italýan dialogynyň ösdürilýändigine aýratyn üns çekildi.
Şeýle-de, italýan taslamalarynyň çäginde türkmen tarapynyň halkara bilim maksatnamalaryna we hünär kämilleşdiriş okuwlaryna gatnaşygynyň giňelýändigi bellenildi. Häzirki wagtda dil we medeni ugurly okuwlar, mugallymlaryň we talyplaryň tejribe geçişleri, şeýle-de Ýewropa Bileleşiginiň «Erasmus+» ýaly maksatnamalary we sebit derejesindäki başlangyçlary durmuşa geçirilýär.
Taraplar hereket edýän ikitaraplaýyn ylalaşyklara, türkmen ýokary okuw mekdeplerinde italýan diliniň okadylmagyna we bilelikdäki medeni-ynsanperwer çäreleriň guralmagyna aýratyn üns berdi.
Duşuşygyň barşynda hyzmatdaşlygy mundan beýläk-de ösdürmegiň geljekki ugurlary barada pikir alyşyldy. Hususan-da, italýan mekdep okuwçylaryna we talyplaryna şu ýylyň mart-aprel aýlarynda geçirilmegi meýilleşdirilýän matematika boýunça halkara olimpiadalaryna gatnaşmak teklip edildi.