Tejen etrabynda migrasiýa gullugynyň bölüminiň täze edara binasy açyldy

Ahal welaýatynyň Tejen etrabynda Türkmenistanyň Döwlet migrasiýa gullugynyň etrap bölüminiň täze edara binasynyň açylyş dabarasy boldy. Täze desga Watan goragçylarynyň güni mynasybetli ulanylmaga berildi.
Türkmenistanyň Döwlet migrasiýa gullugynyň sargydy boýunça amala aşyrylan bu taslamany «Ajaýyp gurluşyk» hususy kärhanasy gurdy. Täze bina elektron resminama dolanyşygyny tiz amala aşyrmaga hem-de ilata hyzmat edilende şahsy maglumatlaryň ýokary derejeli goragyny üpjün etmäge mümkinçilik berýän häzirkizaman kompýuterleri we sanly tehnologiýalar bilen enjamlaşdyryldy.
Binanyň tehniki üpjünçiligi halkara ülňülerine doly laýyk gelýär. Iş otaglaryndan başga-da, işgärleriň we harby gullukçylaryň dynç almagy üçin amatly şertler döredildi.
Bu taslama edaranyň maddy-tehniki binýadyny döwrebaplaşdyrmak boýunça giň gerimli maksatnamanyň bir bölegi bolup, ol ýurduň ähli künjeklerinde gullugyň hünärmenleri üçin täze edara binalarynyň we ýaşaýyş jaýlarynyň gurluşygyny göz öňünde tutýar.