Sarygaýnama garşy dermanlaryň rak töwekgelçiligini artdyrýanlygy baradaky çaklamalar inkär edildi

Demirgazyk Ýewropanyň iri uniwersitetleriniň barlagçylar topary sarygaýnamany bejermek we aşgazan kislotasyny azaltmak üçin giňden ulanylýan proton pompasynyň ingibitorlarynyň (PPI) howpsuzlygyna bagyşlanan uly göwrümli ylmy işiň netijelerini hödürlediler. Işiň barşynda bu dermanlary uzak wagtlap ulanmak bilen aşgazan ragynyň döreme töwekgelçiliginiň arasynda hiç hili baglanyşygyň ýoklugy ýüze çykaryldy.
Barlagyň dowamynda aşgazan ragy diagnozy goýlan 17 müňden gowrak hassanyň we bu keseli bolmadyk, takmynan 172 müň adamyň lukmançylyk maglumatlary seljerildi. Toparlar ýaşyna we jynsyna görä seljerildi. Barlagçylar dermanlary kabul etmegiň dowamlylygyna görä hem-de aýratynlykda bahalandyrdylar we eýýäm ösüp barýan keseliň dermanlaryň bellenilmegine ýetirýän täsirini azaltmak üçin, diagnoz goýulmazdan öňki döwri hasapdan çykardylar. Öňki işlerden tapawutlylykda, bu seljerme köp sanly faktorlary: Helicobacter pylori ýokançlygyny, aşgazan ýarasyny, semizligi, süýji keselini, çilimi, alkogoly we beýleki dermanlary kabul etmegi hasaba aldy. Bu faktorlar göz öňünde tutulandan soň, PPI ulanmak bilen aşgazan ragynyň arasynda statistiki taýdan ähmiýetli hiç hili baglanyşyk ýüze çykarylmady.
H2-reseptor blokatorlary üçin hem meňzeş netijeler alyndy. Awtorlar barlagyň synçy häsiýete eýedigini belleýärler, emma maglumatlaryň göwrüminiň uludygy we  milli lukmançylyk sanawlarynyň ulanylmagy netijeleriň ygtybarlylygyny ýokarlandyrýar.
Barlagyň netijeleri The BMJ žurnalynda çap edildi.