Ermenistanyň premýer-ministri Nikol Paşinýan öz saz toparyny döredendigini habar berdi. Ol bu barada Facebook sahypasynda ýazgy galdyryp, toparyň adyny we logosyny köpçülige ýetirdi.
Ermenistanyň habar beriş serişdeleriniň maglumatyna görä, toparyň ady Varchabend bolup, ol ermeni dilindäki «warçapet» (premýer-ministr) sözüniň birinji iki bognundan we iňlis dilindäki «band» (topar) sözüniň birikmeginden emele gelendir.
Şu aýyň ortalarynda Nikol Paşinýan toparyň ilkinji çykyşynyň 30-njy ýanwarda Ýerewan şäherinde geçiriljekdigini mälim etdi. Konsertiň geçiriljek ýeri baradaky has anyk maglumatlar soňrak yglan ediler. Çärä gatnaşmak üçin öňünden hasaba durmak talap edilýär.
Premýer-ministriň saza bolan höwesi geçen ýyl has-da göze ilip başlady. 2025-nji ýylyň awgust aýynda habar beriş serişdeleri Nikol Paşinýanyň we onuň ýanýoldaşy Anna Akopýanyň saz gurallaryna erk etmek bilen meşgullanyp başlandygyny habar beripdiler. Olar esasan-da, gitara we deprek çalmagy öwrendiler.
Soňra premýer-ministr sosial ulgamlarda özüniň deprek çalyp oturan pursatlarynyň wideoýazgylaryny birnäçe gezek paýlaşdy.
Ermenistanyň premýer-ministri öz saz toparyny döretdi
- 25.01.2026 23:59
- 3.8k+
