Dawosdaky Bütindünýä ykdysady forumynda Ilon Mask Tesla-nyň 2027-nji ýylyň ahyryna çenli Optimus adampisint robotlaryny satyp başlamagy meýilleşdirýändigini yglan etdi. Şol bir wagtda ol, munuň haçan-da, kompaniýanyň robotlaryň ygtybarlylygyna, howpsuzlygyna we funksiýalarynyň ýeterlikdigine ynamly bolan ýagdaýynda boljakdygyny-da duýdurdy.
Milliarder robotlaryň anyk bahasyny aýtmady.
Şeýle hem Mask Teslanyň doly özbaşdak hereket edýän (FSD) awtonom hereketlendiriji ulgamynyň (awtopilot) mümkinçilikleri giňeldigiçe bahasynyň hem ýokarlanjakdygyny aýtdy. Häzirki wagtda FSD ABŞ-da bir gezek satyn almak üçin 8000 dollara, ýazylmak arkaly aýda 99 dollara durýar. Indiki aýdan başlap, kompaniýa modelleriň diňe ýazylyp alynýan görnüşini hödürlemegi meýilleşdirýär.
Mask emeli aňyň geljegi barada hem öz pikirini paýlaşdy. Telekeçi 2030–2031-nji ýyllara çenli tutuş adamzadyň aňyndan öňe geçip biljekdigine ynanýar. Şonuň ýaly-da, ol geljekde planetadaky robotlaryň sanynyň adamlardan köp boljakdygyny we olara gündelik işlerde kömek edip biljekdigini çaklaýar.
«Eger adampisint robotlaryň sany milliardlarça bolsa we meniň pikirimçe, ol şonça köpelerem, onda Ýer ýüzündäki her bir adamyň öz roboty bolar» diýip, Mask aýtdy.
Tesla öz-özüni öwrenýän emeli aň we awtopilot tehnologiýalaryna esaslanýan Optimus robotlaryny işläp düzýär. Kompaniýa Optimus-yň ilkinji neslini 2023-nji ýylyň dekabrynda tanyşdyrdy we önümçilik prototipini 2026-njy ýylyň fewral-mart aýlaryna çenli tamamlamagy meýilleşdirýär.
