Apple ýene-de dünýäniň iň gymmat brendi boldy. Onuň bahasy 607,6 mlrd dollara ýetdi diýip, Brand Finance agentligi «Global 500 – 2026-njy ýylda dünýäniň iň gymmatly 500 brendi» hasabatynda habar berýär.
Ikinji orunda 565,3 mlrd dollar baha bilen Microsoft, üçünji orunda 433,1 mlrd dollar bilen Google ýerleşdi.
Şeýle-de, global liderleriň ilkinji onlugyna Amazon ($369,9 mlrd), Nvidia ($184,3 mlrd), Hytaýyň TikTok kompaniýasy ($153,5 mlrd), Walmart amerikan söwda ulgamy ($141 mlrd), Günorta Koreýanyň Samsung kompaniýasy ($119,2 mlrd), Facebook ($107 mlrd) we State Grid hytaý kompaniýasy ($102,4 mlrd) girdi.
Reýtingde görkezilen kompaniýalaryň sany boýunça ýurtlaryň arasynda ABŞ öňdebaryjydyr. Sanawdaky 500 brendiň 192-si bu ýurda degişli. Onuň yzyndan 68 brend bilen Hytaý, 33 brend bilen Ýaponiýa we Fransiýa, 26 brend bilen Germaniýa we 25 kompaniýa bilen Beýik Britaniýa gelýär.
Iň ýokary ösüşi Britaniýanyň Revolut maliýe tehnologiýalary kompaniýasy görkezdi. Onuň bahasy 239% ýokarlandy. Iň ýokary pese gaçyş Tesla-da hasaba alyndy – 35,8%.
«Global ykdysady ösüş depgininiň gowşakdygyna garamazdan, dünýäniň iň gymmatly 500 brendiniň umumy bahasy geçen ýyl bilen deňeşdirilende 10% ýokarlandy we 10,4 trln dollara ýetdi» – diýip, Brand Finance Turkiye-niň müdiri Muhterem Ilgýuner belledi.
