Ýewropa Bileleşigi howa ýolagçylaryna dahylly täze çäklendirmeleri taýýarlaýar. Olara laýyklykda, howa menzillerinde çemodanlary plastik plýonka bilen örtmegi gadagan etmek meýilleşdirilýär. Bu düzgün daşky gurşawa täsirleri azaltmaga gönükdirilendir.
Köp ýolagçylar öz çemodanlarynyň bir zatlara degip zaýalanmagyndan ýa-da açylmagyndan gorkup, gorag üçin plastik plýonka ulanýarlar. ÝB bolsa bu tejribe uly möçberdäki galyndylaryň döremegine sebäp bolýar diýip pikir edýär. Bir gezek ulanylýan plastigi gaýtadan işlemek kyn bolýar we ol daşky gurşawa ýaramaz täsir edýär.
Täze düzgüne görä, ÝB ýurtlarynda 2030-njy ýyla çenli ähli gaplamalar diýen ýaly gaýtadan işlenilmeli. Gadaganlyk supermarketlerdäki plastik haltalara we käbir azyk önümleriniň gaplamalaryna (meselem, plastik haltalardaky ketçup) degişli bolar. Çemodanlar üçin plastik plyonka hem çäklendirmelere sezewar ediler.
Gadaganlyk 2030-njy ýyla meýilleşdirilýär.
ÝB uzakmöhletleýin meýilnama laýyklykda, 2040-njy ýyla çenli gaplama galyndylaryny 15% azaltmagy maksat edinýär. Käbir aeroportlar üýtgetmelere häzirden taýýarlyk görüp başladylar. Mysal üçin, Gannower aeroporty öz web sahypasynda ýolagçylara goşlaryny plastik plýonka bilen örtmezligi maslahat berýär. Munuň ýerine, zerur bolandam howpsuzlyk işgärleri tarapyndan açylyp bilinýän sanly kodly TSA gulplaryny, şeýle hem gaýtadan ulanylýan materiallardan ýasalan gorag örtüklerini ulanmagy teklip edýär.
