Ýer ýüzüniň iň gök we dury suwy nirede ýerleşýär

Alymlar owadan suratlara ýa-da subýektiw garaýyşlara däl-de, ylmy maglumatlara esaslanyp, Ýer ýüzündäki haýsy suwlary iň gök we dury suwlar hasaplap boljakdygy baradaky soraga jogap bermäge synanyşdy diýip, IFLScience neşiri habar berýär.
Suwuň reňki ýagtylygyň fizikasyna we onuň düzümine baglydyr. Suw az mukdarda bolan wagty reňksiz görünýär, ýöne deňizlerde we köllerde ol gök bolup görünýär. Munuň sebäbi, suwuň molekulalarynyň ýagtylygyň uzyn tolkunlaryny, ilkinji nobatda, gyzyl tolkunlary özüne siňdirip, gysga – gök tolkunlary yzyna serpikdirmegidir. Reňke minerallar, çäge, läbik we organiki maddalar ýaly garyndylar hem täsir edýär. Şol bir wagtyň özünde, ýokary durulyk elmydama doýgun gök reňki aňlatmaýar, ýöne ol arassalygyň möhüm görkezijisi hasaplanýar.
Alymlaryň pikiriçe, dünýäniň iň dury süýji suwy Täze Zelandiýanyň Nelson-Leýks milli seýilgähinde ýerleşýän Rotomairewenua (Gök köl) kölüdir. Suw we atmosfera gözlegleriniň milli institutynyň (NIWA) 2011-nji ýyldaky barlaglary bu ýerde suwuň aşagynda 80 metre çenli çuňlugy görüp bolýandygyny görkezdi. Bu bolsa arassa suw üçin iň ýokary çäk diýen ýalydyr. Şeýle üýtgeşik durulyk suwuň buzluk gatlaklary arkaly tebigy usulda süzülip geçmegi bilen düşündirilýär. Maori halky üçin bu köl mukaddes hasaplanýar.
Deňizleriň arasynda bolsa Antarktida kenarlaryndaky Ueddell deňzi rekord eýesi hasaplanýar. 1986-njy ýylda geçirilen barlagda Sekki diski (durulygy ölçemek üçin gural) 79 metr çuňlukda görnüpdi. NASA-nyň 1970-nji ýyllardan bäri umman reňkini öwrenýän hemra maglumatlaryna görä, iň uly we goýy gök suwlar Ýuwaş ummanyň günorta bölegindäki Günorta-Ýuwaş umman aýlawynda ýerleşýär. Bu ýer ýaşaýyş konsentrasiýasynyň örän pesdigi sebäpli, «umman çöli» diýlip atlandyrylýar.