2026-njy ýylyň tomsunda Berliniň häkimiýetleri «BerlinPay» maksatnamasyny ýola goýmagy meýilleşdirýär. Onuň çäklerinde syýahatçylar zibil ýygnamak we jemgyýetçilik başlangyçlaryna gatnaşmak arkaly medeni çärelere, muzeýlere hem-de restoranlara barar ýaly wauçer alyp biler.
Euronews habar gullugynyň mälim etmegine görä, bu başlangyç rugsat berilmeýän ýerlerde zibilleriň taşlanmagy bilen baglanyşykly meselä garşy göreşmäge gönükdirilendir. Şeýle zibilleri arassalamak üçin çykdajylar 2025-nji ýylda 13,1 million ýewro ýetdi.
Visit Berlin syýahatçylyk agentligi bu taslamany paýtagtyň abadanlaşdyrylmagyna goşan goşantlary üçin şäheriň myhmanlaryna «aýratyn täsirleri» hödürlemek mümkinçiligi hökmünde häsiýetlendirýär. Häzirki wagtda hyzmatdaşlary gözlemek işleri işjeň alnyp barylýar. Şunda suw serişdeleri bilen baglanyşykly guramalar ileri tutulýar, sebäbi bu mowzuk 2026-njy ýylda syýahatçylyk üçin esasy ugur bolar. Maksatnamanyň doly tanyşdyrylyşy maý aýynyň ortalaryna meýilleşdirilýär.
Bu pikir Daniýanyň tejribesinden alyndy, ol ýerde 2024-nji ýyldan bäri CopenPay taslamasy üstünlikli işleýär. Geçirilen barlaglar adamlaryň dynç alyş wagtynda täze endiklere has açyk bolýandygyny görkezýär: Daniýanyň maksatnamasyna gatnaşyjylaryň 70%-i ekologiýa taýdan has arassa durmuş ýörelgesine eýerip başlady.
Guramaçylar Berliniň bu başlangyjynyň diňe bir şäheriň arassa bolmagyna kömek etmän, eýsem syýahatçylarda daşky gurşawa jogapkärli garaýşyň kemala gelmegine hem ýardam eder diýip umyt edýär.
