Indoneziýada mundan beýläk pil münmek gadagan: bu jandara zeper ýetirýär

World Animal Protection guramasynyň saýtynda berilýän habara görä, Indoneziýanyň häkimiýetleri ähli tebigat goraghanalarynda we syýahatçylyk desgalarynda pile münüp gezelenç etmegi gadagan etdiler. 
Bu baradaky resmi hat eýýäm 2025-nji ýylyň ahyrynda çap edilipdi. Balidäki «Meýson» piller seýilgähi ýurtda bu hyzmaty hödürleýän iň soňky ýerleriň biri bolup galypdyr. 2026-njy ýylyň 25-nji ýanwarynda, häkimiýetleriň resmi duýduryşlaryndan soň, bu seýilgähde hem şeýle hyzmat ýatyryldy. 
Talaby berjaý etmeýän guramalara iş rugsatnamalarynyň yzyna alynjakdygy duýduryldy.
Alymlar we haýwanlary goramak boýunça hünärmenler piliň üstüne münüp gezmegiň haýwanyň saglygy üçin zyýanlydygyny tassyklaýarlar. Haýwanlary üstünde adam götermäge mejbur etmek üçin köplenç agyryly we stresli tälim beriş usullary ulanylýar. Bu bolsa olaryň tebigy häsiýetlerini çäklendirýär we uzak wagtlyk fiziki hem-de psihologik zeper ýetirip bilýär. Gezelençleriň bes edilmegi pilleriň öz kowumdaşlary bilen gatnaşmak, otlamak we suwa düşmek ýaly tebigy endiklerine has köp wagt sarp etmegine mümkinçilik berýär.