Türkmen halkynyň Milli Lideri Arkadag şäherinde Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň we Arkadag şäheriniň häkimi G.Mämmedowanyň gatnaşmagynda iş maslahatyny geçirdi. Maslahatyň dowamynda şäherde gurulmagy meýilleşdirilýän medeni-durmuş maksatly binalaryň, şol sanda ýaşaýyş jaýlarynyň gurluşygyna we bilim ojaklarynyň işine aýratyn üns berildi.
Gurbanguly Berdimuhamedow täze şäheriň bilim ojaklarynyň işini döwrebap guramak, şeýle-de bilim alýan ýaşlary höweslendirmek maksady bilen, birnäçe talyp haklaryny girizmek meselelerine hemmetaraplaýyn esasda çemeleşmelidigini belledi. Türkmenistanyň Halk Maslahatynyň Başlygy «Döwlet adam üçindir!» diýen baş ýörelgeden ugur alyp, halkyň ýaşaýyş-durmuş şertlerini yzygiderli gowulandyrmak boýunça birnäçe degerli maslahatlaryny berdi.
Şeýle-de, iş maslahatynyň dowamynda Arkadag şäheriniň häkimi ýurtda giňden belleniljek şanly senelere — Türkmenistanyň Konstitusiýasynyň we Döwlet baýdagynyň gününe hem-de Türkmen halysynyň baýramyna görülýän taýýarlyk barada hasabat berdi. Meýilleşdirilen baýramçylyk çäreleri halkyň bagtyýar durmuşyny, milli gymmatlyklara bolan sarpasyny we ýurduň ähli ugurlar boýunça gazanan ýokary ösüşlerini dabaralandyrmaga gönükdirilendir.
Türkmen halkynyň Milli Lideri baýramçylyk dabaralarynyň guramaçylykly geçirilmelidigini we olara ilat köpçüliginiň işjeň gatnaşmagyny üpjün etmelidigini nygtady.
