Meksikaly türgen Enrike Sapata 24 sagadyň dowamynda 12 345 gezek turnikde çekilip, dünýä rekordyny täzeledi. Bu netije mundan ozal 11 900 gezek çekilen belgiýaly Lennert Şotsyň rekordyndan ýokary boldy.
Sapata bir gije-gündiziň dowamynda minutda ortaça sekiz gezek çekilmegi başardy. Ol bu netijäni gazanmak üçin bäş ýyldan gowrak wagtlap taýýarlandy. Mundan ozal hem oňa 8 sagadyň (4 949 gezek) we 12 sagadyň (7 100 gezek) dowamynda çekilmek boýunça rekordlar degişli bolupdy, ýöne soň olar beýleki türgenler tarapyndan täzelendi.
Sapatanyň aýtmagyna görä, ozal onuň saglyk bilen bagly kynçylyklary bolup, artykmaç agramdan, gipertoniýadan we alkogol garaşlylygyndan ejir çekýärdi. Deýwid Gogginsiň «Can’t Hurt Me» atly kitaby bilen tanyşmagy onuň durmuşynda öwrülişikli pursat boldy we şondan soň ol işjeň türgenleşip başlady.
Netijä ýetmek üçin türgen ýörite dem alyş usullaryny ulandy, agramy kem-kemden artdyryp türgenleşdi, elleri üçin gorag serişdelerini peýdalandy we bedeniň kadaly dikelmegine üns berdi.
Sapatanyň bellemegine görä, ol bäş ýylyň dowamynda turnikde bir million gezekden hem köp çekildi we häzirki wagtda çydamlylygy hem-de güýjüni ösdürmek üçin türgenleşiklerini dowam etdirýär.
